الجمعة، 17 فبراير، 2012

ياللي عملت لمصرنا عيد

ياللي فتحت الباب لعيونّــــا

من غيرك واللـه ولا كنّــــا

لما لقيتنا ضعفنا وهونّـــــــا

قمت كسرت الظلم بإيد

إنت يا غالي يا أغلي شهيد

******************

عاوزه أقولها يا رافع راسي

عاوزه أقولك كنت خلاصي

تاج والله وحاطّه فوق راسي

ده انت عملت لمصرنا عيد

إنت يا غالي يا أغلي شهيد

****************
اعرف إن الحق راجع لك

باحمل راية وراك وتابع لك

خوفنا كسرته حقيقي بفعلك

دمك دمي باقولها واعيد

إنت يا غالي يا أغلي شهيد

******************
عاشت مصر الفرحة بسببك

راحة شعبنا جت من تعبك

علشان كده من قلبي بواعدك

بكره الحق يكون في الإيد

إنت يا غالي يا أغلي شهيد

*********************

بكره يدوق الموت جلادنــــــا

اللي فقدنا بظلمه ولادنـــــــــا

بكره هاتفرح مصر بلدنـــــــا

برجوع حق بريء وشهيــــــــــــد

إنت يا غالي يا أغلي شهيد

********************

وساعتها أنا بامسح دمعي

باكتم صرخي وصورتك جنبي

وباقولك إرتاح بقي يا ابني

نام مرتاح فرحان وسعيد

إنت يا غالي يا أغلي شهيد

ليست هناك تعليقات:

إرسال تعليق